انا كنت محتاره جدا انا هتكتب ايه في يوم ليلي كان في دماغي كازا فكره منهم التفرقه في المعامله في البيت وازاي البنت تمردت عن علي الحكايه دي وبقت مسخ ولاهي بنت ولاهيا ولد وفكره التفرقه بين البنت والولد في الدراسه والشغل ولا المعاكسات اللي بتحصل للبنات في الشغل و ازاي لازم الواحده علشان تاخد شغل حلو تفقد احترامها لنفسها ولجسدها
ولا المعاكسات اللي بتحصل في الشارع وكل واحد بيبص للبنت علي انها شيء مستابح ليه ولو فكرت انها تعترض وتقول لا تبقي قليله ادب
بس استقريت علي اني احكي حاجه انا لاحظتها بتحصل في الجامعه والشغل و لاني وبصراحه شديده مش عاوزه اتكلم في موضوع المعاكسات علشان كفايه تهزيق بصراحه مليش نفس لتهزيق زياده
انا هحكي عن تجربه شخصيه جدا حصلت معايا من وانا في سنه اولي كليه او اعدادي هندسه ودايما بسمع ان قسم عماره دا قسم بنات مش عارفه ليه مع ان كميه الشغل والتعب فيه كتيره لدرجه ان كان في ولاد بيسقطو وسط تبيض المشاريع في الاتيليهات
واحنا في التيرم التاني كان عندنا ماده اسمها الرسم المعماري وكان بيديهالنا دكتور الله يرحمه اسمه دكتور نبيل
وكان المشروع اننا ننزل نرفع بيت ونرسمه ونعمل تصميم من اول وجديد ليه
هننزل فين هتنزلو سوق السلاح

يا حلاوه

احم طب مفيش منطقه ارقي من كده شويه يا دكتور
لاااا

حاضر

ونزلنا كنا انا في مجموعه 4 ولاد وانا البنت الوحيده قلت بقي صباحو دلع ومش هنزل وبتاع رحت اول مره مع الناس كلها وقلت شكراا الدكتور كان بيدور ورانا وقال اللي مينزلش قلولي عليه
وكل شويه يقلي رحتي يا بشمهندسه اقله ايوا طبعا يا دكتور
لحد ما في مره زنقني في سؤال وقالي هوا المحل اللي تحت البيت دا في شباك جوا؟
ضربت اخماس في اسداس في اعشار كمان وقلتله لا
بص للولاد وقالهم في؟
العيال قعدو يضحكو وقالو اه
احم طبعا لا تعليق علي منظري قدامه بعد ما السكشن خلص راح قالي تعالي عاوزك
قلت في سري سلاما قولا من ربا رحيم استرها يا رب خير يا دكتور

راح مزعقلي وقالي بصي بقي انا محبش دلع البنات ومفيش فرق بين ولد وبنت هنا مبتشتغليش ليييه؟ قلتله المكان بعيد قوي ومش ولابد بصراحه والحاره ضيقه وقرف
قالي طيب انا بقي معنديش الكلام دا وهتنزلي زيك زيهم وهترسمي لوحدك وهتكلمي صاحب البيت لوحدك
قلتله دا جزار وماشي بساطور قالي طظ انتي مش بتعملي حاجه غلط انتي متفرقيش عنه حاجه
الحق يقال كلامه اثر فيا قوي وحسسني اني مش عضو زائد في المحموعه وخلاص وبعدين لاحظت انه بيدي البنات شغل كتير ولما نقله تعبنا يقلنا ماهما متعبوش تفرقو عنهم ايه
البنات زي الولاد في الشغل والدراسه والبيت
كنت معجبه قوي بيه ويمكن دا شخصيته هيا اللي اثرت علي طريقه تفكيري في حياتي واصراره اننا منفرقش كتير عن الولاد واننا نبطل التخلف دا بقي اللي مودينا ورا
لكن للاسف

النوعيه دي من البني ادمين الي بتفكر قليله قوي سواء رجاله او ستات للاسف يعني

في سنه من السنين

اتخبطت في دكتوره ربنا يسهلها بقي كانت مقرفه كل ما نقلها ننزل تدريب في موقع تلقنا انتو لييه فاكرين نفسكو رجاله يالا انتو مكاتب

اووووووووف

طب انا بكره شغل المكاتب وبكره الاوتو كاد اعمل ايه
اقعدي في بتكو يا ماما
وقد كان بقيت اضرب شهادات التدريب وانا في بيتنا

لاني مكنتش مستعده اروح اشتغل في مكتبهاا زي العبده وتقلي دا تدريب وتدي حته ورقه في الاخر

المره الوحيده اللي نزلت تدريب في موقع كنت قمه في الانبساط وبروح كل يوم بقي وعايشه في الموقع
لاحظت كازا نقطه بقي
اولهم
كلهم مهندسين رجاله
الست الوحيده اللي موجوده كانت المديره ودي العربيه بتجبها لحد بابا المكتب وتيجي تاخدها منه غير كده مبتتحركش ولا بتروح الموقع
لكنها ايه صارمه جدا وكلهم بيخافو منها وكانت كبيره في السن طبعا
العمال بيرفضو اي واحده تشتغل معاهم وبيطلعو فيها القطط الفطسانه
استهانه المهندسين بالبنات اللي بيتدربو واللي هما مش هيستحملو حاجه ودا في جزء من الحقيقه بصراحه الشمس بتبقي جامده قوي والخوذه تقيللللللللللللللللللله
ومش هنيفع نجيب ايس تي نشربه مثلا
وانتي واقفه تحضري صب عمود مثلا او صب سقف
وخلصو شهرين التدريب وانا حزينه قوي

وحتي لما كان في ابحاث في المواد كانت بتقلنا اعملوها في البيت طب ازاي احنا هنحتاج صور تقول من النت؟

نت ازاي يعني ولما كنا نبنفضلها ونروح نصور وبتاع كانت بتاخد الشغل مننا علي الجاهز وبرغم كده عمرها ما ادتنا درجات نهائيه خالص كانت دايما بتديها للولاد مع انهم بيبقو ضاربين الشغل في نص ساعه

ومش في الهندسه بس لا في كل المهن بقي في مهن حريمي ومهن رجالي
يعني الدكتوره الست ييع عيب
الدكتور الراجل اه حلو وجميل وامور وايده تتلف في حرير كمان
الكستمر سيرفيس ست ماهي لازم تبقي مزه وصوتهاا ناعم
السكرتيره لازم تبقي ست ومينفعش يبقي راجل
ولو محجبه يبقي الارشيف مكانك او يا تقلعي الحجاب بقي ساعتها نفكر

يعني بكل بساطه بقت الست تتحط في الفترينا للعرض فقط علشان شكلهاا مش علشان عقلها او خبرتها او دراستها لا خالص

يعني تهميش وتسفيه نص المجتمع
نصه ايه بقي ما البنات بقو اكتر من الرجاله وبرده مش فارق