من زمان وانا صغيره كنت بحس اني لما هوصل لسن 25 سنه هبقي حاجه في المجتمع

مش عارفه ايه هيا بس دايما كنت بحس بكده

علي اضعف الايمان هبقي متجوزه مثلا وعندي بيبي بلعب بيه

وكان ليا افكار كتيره وامنيات كتيره قوي وكنت دايما معتقده وحاطه في دماغي اني هكون نفذتها وانا عندي 25 سنه

كان بالنسبه ليا رقم بعيد قوي

يمكن لما قريت تدوينه رضوي عن مضي ربع قرن

كان في حاجات كتيره هيا قالتها كان نفسي تحصل منها ان شعري يبقي زي شعر مي عبد النبي

:D

لكن اهو كملنا الربع قرن زي ما بيقولو عملت ايه؟

ولا حاجه

يمكن لاني فعلا انسانه كسوله وبحب اعمل الحاجات بمزاجي يعني ولا مجبره ولا تحت ضغط

مش عارفه

عموماا هنشوف بعد ربع قرن تاني ايه اللي ممكن اكون حققته ؟

مش عارفه ليه متخيله اني هبقي برده قاعده قدام الكمبيوتر بشتغل وبدون

ههههههه هبقي تيته شيماء

المهم اني يوم عيد ميلادي سمعت تعليقات من ماما واخواتي جامده قوي

ماما بتقلي وانا عندي 25 سنه كنت مخلفه اتنين -ملحوظه ماما معايا في نفس الشهر بس هيا يوم 9-

اختي اسراء الصغيره تقلي يارب السنه الجايه تكوني في بيتك بقي وانزحتي من علي قلبنا

اختي هبه تقلي مفروض بعد كده تعدي بالعكس يعني السنه الجايه يبقي 24 واللي بعدها 23 وكده يعني

طبعا مردتش عليهم لحاجتين زوري كان واجعني يومها قوي ومكنليش نفس ارد بصراحه علي التعليقات اللي كلها موضوعها واحد

الظريف بقي ان مش انا ورضوي بس اللي كملنا الربع

عمنا علاء سبقنا بشهر

والحاج مالك هيحصلنا يوم الجمعه الجايه

محتاجين نعمل احتفال فعلا باليوبيل دا

مش قلنا ان شهر ديسمبر دا شهر العظماء

:P